曼聯讓主「士」日精選

曼聯讓主「士」日精選
 
英超周日獨腳戲有曼聯頂住，仲有法卡奧、馬高斯盧祖同埋戴利白蘭特一班新援喺奧脫福亮相，作客嚟到嘅昆士柏流浪做硬箭靶，之前喺紅魔鬼身上損手嘅球迷有望一鋪翻身，「讓主」冇「昆」你。（周日40，now621台周日11:00pm直播）

曼聯新球季踢到一鑊粥，開鑼先喺主場輸俾史雲斯，繼而連和新特蘭同埋般尼，踢3場英超得兩分，中途仲喺聯賽盃意外慘負英甲嘅米爾頓凱恩斯0:4，衰過莫耶斯年代，無論你係買佢定係齋支持，應該都激到爆血管，好在今日嘅對手昆士柏流浪唔算強，計往績紅魔鬼近12次交手10勝2和不敗，格食格到呢個地步，好應該反底啦！

曼聯今季新援全可候命

天價借將法卡奧、阿根廷國腳馬高斯盧祖同埋雲高爾愛將戴利白蘭特全部都可以處子登場，而勞基梳爾同埋安達靴里拉亦傷癒，終於可以喺正式比賽亮相，咪忘記英超標王迪馬利亞都踢得，呢隊全新曼聯雖然欠少少默契，但陣容就肯定超班，雲高爾仲要煩點樣安排尹佩斯、朗尼同法卡奧一齊出場，隨時要奢侈到犧牲桑馬達。

巴頓受傷昆流中場大鑊

昆士柏流浪唔係唔想爆冷，不過以佢哋嘅實力真係好勉強，開季後喺英超連負侯城同熱刺，聯賽盃又俾低組別嘅伯頓踢出局，如果唔係國際賽檔期前辛苦小勝新特蘭1:0開齋，領隊哈利列納可能已經烏紗不保。里奧費迪南倒戈固然矚目，伊度亞度華加斯、卡蘭積卡同埋辛度雲尼亞里3位新兵嘅加盟亦惹人關注，好可惜話題人物祖爾巴頓有傷，要通過最後體測先可以上陣，阿根廷外援艾真度科連亦肯定倦勤。
鑑於兩隊人腳相差太遠，曼聯季初雖然害人不淺，但昆士柏流浪亦唔見得好好，考慮到紅魔鬼好有決心反底贏波，有強援坐鎮之餘，往績又呈現一面倒，所以足智彩開讓球主客和，「讓主」點都要信多一次。