意甲:回師聯賽阿特蘭大照嗒拉素
玩球网 2021-01-31 11:16:33
| 回師聯賽阿特蘭大照嗒拉素今輪意甲焦點之戰，阿特蘭大主場對拉素，雙方上周中喺意大利盃8強交鋒，結果阿特蘭大贏3比2，連續3次擊敗拉素，短時間再喺同一地點對壘，戰局唔會有咩變化，再追阿特蘭大主勝。（myTVGold301、Now638、有線654、614、662及602台周日晚10時直播）阿特蘭大今季延續「神奇球隊」本色，近14場比賽不敗，錄得9勝5和，包括擊敗意甲榜首勁旅ＡＣ米蘭，大勝另一支前列強隊羅馬4比1，以及作客打和班霸祖雲達斯。阿特蘭大上場意大利盃對拉素，開波7分鐘就打開紀錄，雖然之後被拉素反超前，但最終仍然贏3比2。阿特蘭大最犀利係有40分鐘踢少1人，都可以反敗為勝，可見球隊韌力十足。近3次交手拉素全敗事實上，阿特蘭大一向係拉素嘅剋星，雙方近7次對賽，阿特蘭大取得5勝1和1負，其中近3次交鋒，阿特蘭大都勝出，合共轟入拉素10球，令對手難以招架。拉素雖然近4場聯賽全勝，但當中有3場係主場，睇番佢哋近4場聯賽作客僅1勝，而且對手係護級球隊帕爾馬。除此之外，拉素往往遇強即屈，包括聯賽作客不敵ＡＣ米蘭，主場逼和國際米蘭、祖雲達斯1比1，甚至喺主場以1比4大敗於阿特蘭大腳下，今場作客再鬥呢支火力強勁嘅「神奇球隊」，拉素形勢非常悲觀。 |