西甲:主場夠勁撐馬體會上盤
玩球网 2021-01-24 10:28:18
| 主場夠勁撐馬體會上盤今晚西甲尾場，榜首馬德里體育會主場鬥華倫西亞。馬體會喺西甲表現一枝獨秀，奪冠前景一片光明，佢哋近7場聯賽主場全勝，當中5次淨勝對手2球或以上，威力強勁。華倫近況雖有起色，但作客凶多吉少，馬體會讓一球／球半照撐上盤。（Now632周一凌晨4時直播）聯賽6連勝愈踢愈有馬體會今季喺西甲及歐聯雙線發展，為免分薄兵力，本月初西班牙盃只派遣副選應戰，結果畀哥尼拿淘汰出局，其後喺聯賽主場迎戰勁旅西維爾，強陣出擊下即輕取對手2比0，趁住歐聯16強仲未展開，馬體會目前可安心喺聯賽全力出擊，務求鞏固領先優勢。馬體會今季喺西甲只係輸過1場，就係作客0比2不敵皇馬，之後聯賽踢出6連勝走勢，好成績有賴一條鋼鐵防線，令失球數字極低，暫時只失7球，前鋒線上獲蘇亞雷斯加盟後，今季入波數字亦大幅上升，至今攻入33球。除「哨牙蘇」外，安祖哥利亞及沙奧尼古斯近期都有上佳演出，難怪愈踢愈有。華倫今季令人失望，現時排喺中下游位置，雖然佢哋遇強隊偶有佳作，包括贏過皇家蘇斯達同皇家馬德里，以及打和巴塞隆拿，不過睇番首循環交手，華倫主場都輸0比1，作客更加凶多吉少。 |