英超:維拉搶Ｗ硬砌紐卡素
玩球网 2021-01-23 10:10:02
| 維拉搶Ｗ硬砌紐卡素今日有場英超補賽，阿士東維拉主場對紐卡素。維拉經過一場同曼城嘅熱身，相信球員已經搵番比賽感覺，紐卡素連盃賽9場不勝，包括4場聯賽作客全敗，維拉難得遇到態沉嘅喜鵲，正好搵佢哋做反彈跳板，熱捧主W。（Now621周日凌晨4時直播）基亞利殊巴克里有料到維拉因疫情關係，之前經過3周聯賽改期，周中終於同聯賽失分最少嘅曼城復賽，雖然輸0比2，但其實球隊去到79分鐘先失第一球，個波仲有啲越位爭議添，隊中主力如基亞利殊、巴克里同達米安馬天尼斯都有好表現，BBC賽後畀3人嘅評分高過晒曼城全隊。雖然維拉領隊甸恩史密夫因為上場抗議第一個入波畀球證趕出場，今場維拉要由助教領軍，但無損球隊贏波決心，維拉聯賽3場不勝，但對手分別係車路士、曼聯同曼城，今場面對排名15嘅紐卡素係反彈良機。喜鵲連盃賽9場不勝，包括4場聯賽作客全部輸晒，其中3場更加係零入波，球隊首席射手哥林威爾遜自12月中對富咸射入1球之後，超過1個月未入過波，疲弱嘅鋒力係致命傷，今場作客都係乖乖放低3分，推介維拉主勝。 |