德甲:羅拔仔又嚟喇！拜仁Encore再炒緬恩斯
玩球网 2021-01-03 11:23:19
| 羅拔仔又嚟喇！拜仁Encore再炒緬恩斯今晚繼續有德甲，榜首拜仁慕尼黑主場迎戰尾二嘅緬恩斯。拜仁實力超晒班，箭頭羅拔利雲度夫斯基年尾攞獎攞到手軟，旺氣逼人，相反緬恩斯未見起色之餘，更發生管理層大地震，而且近年造訪拜仁均慘敗居多，就算讓2.5/3球照捧上盤。（周一凌晨1時開賽）拜仁歇冬前憑羅拔利雲度夫斯基梅開二度，以2比1反勝利華古遜，呢名波蘭箭頭弗到漏油，單計今季聯賽已有17球進帳，更喺年尾連奪世界足球先生及環球足球獎最佳球員，隊友湯馬士梅拿及京士利高文並列助攻榜首位，之前重傷嘅防中甘美治亦極速康復，上仗對利華古遜已經後備落場，陣容更齊整。緬恩斯內部立立亂相反，緬恩斯今季13場聯賽僅1勝，上次贏波已經係上年11月尾嘅事，球員信心必定出現動搖，而且歇冬期間，緬恩斯更發生管理層大地震，前總經理希度進入董事局，前主帥馬田舒密特則擔任體育總監，季初先接手嘅主帥列迪即時被炒，教練一職暫由青年軍教頭施維特頂上，內部立立亂，話對軍心冇影響就假喇！翻查紀錄，拜仁近3次主場對緬恩斯唔單止贏晒，更狂轟16粒，而且每場都贏至少4球，包括上次大炒6比1，緬恩斯依家弱上加弱，今場都係等炒格，上盤咪錯過。 |