意甲:瑞典神鋒又傷明年再見
玩球网 2020-12-20 10:39:47
| 瑞典神鋒又傷明年再見2020/12/20AC米蘭射手伊巴謙莫域（圖）早前受傷之後，原本近日已經復操，但係呢位39歲瑞典神鋒喺操練時又受傷，估計需要再抖10日，意味今年餘下賽事都唔使預佢。據悉，伊巴謙莫域今次係左腳大腿肌肉受傷，經過檢查之後，雖然傷勢唔算嚴重，但估計仍然需要休息10日。由於AC米蘭今年只餘下兩場比賽，包括今晚意甲作客對薩斯索羅，以及12月24日凌晨主場對拉素，所以最快都要等到2021年，先至可以再睇到呢位瑞典神鋒比賽。伊巴謙莫域今季曾經確診新冠肺炎，但復出之後，表現仍然大勇，佢今季意甲已經攻入10球。喺伊巴謙莫域近期養傷之下，暫列聯賽榜首嘅AC米蘭成績亦走下坡，近兩場意甲對住實力較弱嘅帕爾馬同熱拿亞，結果都只能和波，連番失分之下僅領先第2位國際米蘭1分，依家呢位老將要繼續抖，AC能否保住榜首之位，實在令人懷疑。AC作客薩斯索羅吼大盤「紅黑兵團」近兩場都踢得慌失失，同樣落後之下，僅逼和對手2比2，今晚作客薩斯索羅似乎又有失分危機。不過，考慮AC攻力尚算唔錯，已經跨季連續14場聯賽，每場入到兩球或以上，創出意甲最長連續入球「2+」紀錄，捧2.5球入球大係最佳選擇。（myTVGold302、Now639、有線602、662、615及655台周日晚10時直播） |