英超:惡客維拉恰到西布朗
玩球网 2020-12-20 10:39:18
| 惡客維拉恰到西布朗周一凌晨英超上演「西米德蘭茲郡打吡」，西布朗主場迎戰阿士東維拉。深陷降班區嘅西布朗，搵嚟「大Sam」艾拿戴斯執起球隊教鞭，頂替啱啱被炒嘅比歷。經歷主帥調動，一時三刻要適應絕對冇咁易，今場仲要遇上作客特別醒嘅維拉，隨時凶多吉少，捧番客勝好過。（Now621周一凌晨3時15分直播）西布朗上場雖然作客以1比1逼和強敵曼城，但呢場戰果唔足以幫比歷保住飯碗，這位帶領西布朗重返英超嘅前克羅地亞國家隊主帥，賽後慘食無情雞，由「大Sam」艾拿戴斯接過教鞭。「大Sam」過往曾執教保頓、韋斯咸、新特蘭等球隊，尤其處理護級任務係有一手，不過佢2018年同前東家愛華頓分手後，超過兩年一直賦閒在家，佢仲有冇魄力帶領球隊走出困境，依然係未知之數。大Sam剛掌帥成效難料西布朗以7分深陷積分榜尾二，聯賽至今贏得1場，攻守兩端都存在問題，球會高層認為要喺季中及時止血，推倒重來，未必係壞事，不過要班波即刻適應一套全新戰術並唔容易，「大Sam」要為西布朗搵番勝利方程式，都需要一段時間。況且上季僅僅護級嘅阿士東維拉，今季脫胎換骨，尤其作客發揮優異，近5場取4勝1負，包括贏過李斯特城同阿仙奴，而且4場勝仗都成功保住清白身，表現極具說服力，呢場巴西中場杜格拉斯雷斯坐完波監復出，維拉陣容更加完整，有本錢喺呢場打吡戰旗開得勝。 |