歐霸盃:後備博上位！李城炒得起AEK
玩球网 2020-12-10 09:10:48
| 後備博上位！李城炒得起AEK今晚歐霸G組煞科戰，英超4哥李斯特城主場硬撼希臘勁旅AEK雅典。雖然李城已經提早出線，但今場贏波才確保首名出線資格，伊恩拿祖、辛基斯安達、咸沙祖靴里等副選喺今屆歐霸堅搶韁，必趁機會爭取表現；AEK雅典已出局冇晒包袱，隨時鬥攻，捧2.5球嘅大盤最上算。（Now644及有線603台周五凌晨4時直播）伊恩拿祖腳風順李斯特城目前於G組與布拉加同得10分，李城對賽成績較佳排榜首，其實李城踢完頭4輪歐霸後，已篤定出線，不過陣中傷兵唔少，包括艾馬迪、卡斯泰尼、列卡度彭利拿及蘇恩古等中後場球員，其中後者上輪歐霸對索爾亞復出，踢咗15分鐘即告傷出，同場亦有列卡度彭利拿踢咗半場就被換走，相信兩人都要再抖一段時間。查實主帥羅渣士亦借歐霸畀一班副選保持狀態，好似伊恩拿祖、辛基斯安達、咸沙祖靴里等喺英超冇乜機會上陣，所以嚟到歐霸非常搏命，當中伊恩拿祖今屆已有3球進帳，非常生性，難得有得擔正，甚至比一班主力更有戰意。另一邊廂，AEK雅典頭5輪分組賽只得1勝4負，落後2哥布拉加7分，宣布提早出局，今仗只係例行公事。不過呢支希臘勁旅有前冇後，令防線中門大開，連同附加賽在內，近6場歐霸共失14粒，全開3球或以上，其中4仗於上半場已經失守，加上出咗局更可盡情進攻，不妨再追大盤。 |