英超:拖肥兵殘變陣咬唔入般尼
玩球网 2020-12-05 11:19:48
| 拖肥兵殘變陣咬唔入般尼今晚英超頭場，般尼主場迎戰「拖肥」愛華頓。「拖肥」愈踢愈頹，其中兩閘齊傷對側擊影響甚大，加上近年造訪般尼例冇運行，仲要讓波咪玩喇，轉捧讓球主勝。（ViuTV99台及Now621周六晚8時30分直播）愛華頓開季聯賽4連勝，係威係勢咁，但自從默西賽德打吡逼和利物浦後，「拖肥」就開始跌Watt，連同打吡在內，近6場聯賽只得1勝1和4負，唯一勝仗係險勝下游分子富咸，如果唔係對方12碼宴客，隨時又失分。查實愛華頓季初順風順水，中場中路用杜哥利、安祖高美斯及阿倫盧利奧殿後，畀占士洛迪古斯可以盡情進攻，但4人全部集中晒喺中路，因此呢個4312陣式，側擊非常倚賴兩閘助攻，史密斯高文及盧卡斯迪治尼亦做到瞻前顧後，合共交出5次助攻。可惜兩人近期受傷，主帥安察洛堤突然改用3421陣式，但湯姆戴維斯及伊禾比出任翼衞效果麻麻，新人賓葛菲特喺3人防線中屢有犯錯，令攻守失衡，難怪近期咁頹。近4主場3挫愛華頓般尼開季堅差，頭7場聯賽未贏過，上次主場出擊以1比0擊敗水晶宮先至開齋，表現有番啲起色。之後作客曼城慘吞5蛋，純粹技不如人，去到下半場中段更收起箭頭基斯活特，明顯提早投降，比數未能完全反映球隊表現。翻查紀錄，般尼近4次聯賽主場對愛華頓，取得3勝1負，仲唔趁「拖肥」咁頹搶分咩，受讓好路。 |