英超:曼聯作客特醒大反擊
玩球网 2020-12-05 11:18:58
| 曼聯作客特醒大反擊韋斯咸Set定雙炮偷襲今晚英超話題之戰，曾被「紅魔鬼」嫌棄嘅莫耶斯帶領韋斯咸主場迎戰曼聯。韋斯咸聯賽3連勝，已經殺上第5位，比少賽1場嘅曼聯仲高4位，今場再贏曼聯的話，莫耶斯就真係威威。不過曼聯今季聯賽作客豪取4連勝，氣勢絕對唔輸畀韋斯咸，今場好大機會出現鬥攻場面，中位數2.5球入球大好路。（Now621周日凌晨1時30分直播）韋斯咸上周聯賽主場以2比1擊敗阿士東維拉，自2019年5月以來，首次取得聯賽3連勝，造就「錘仔幫」領隊莫耶斯今場決戰曼聯成為一大焦點。講真，「莫天才」帶波就真係唔算叻，但趁隊波走勢當旺，再贏埋舊東家曼聯的話，就真係抵佢牙擦。莫耶斯教韋斯咸，繼續用其最耍家嘅防反戰術，上季中加盟嘅23歲前鋒查洛保雲表現出色，喺擊敗維拉一役貢獻1傳1射，表現搶鏡。莫耶斯嘅戰術體系，點都要用番個撞得嘅前鋒，30歲嘅米查利安東尼奧就啱晒佢心水。安東尼奧雖然技術平平，但勝在不停走位夠晒勤力，利用身體質素及速度，喺球隊反擊時作用甚大，今季佢已經射入3球，今場隨時又有斬獲，事關曼聯隊長哈利馬古尼及域陀連迪路夫出晒名轉身慢，米查利安東尼奧隨時可以喺佢哋身上搵到着數。紅魔鬼防線甩漏未解決曼聯今季作客成績超勁，聯賽作客4連勝，不過值得留意係「紅魔鬼」全部都係落後下反勝，反映佢哋防守唔集中，領隊蘇斯克查仲未諗到辦法解決，今場要保不失唔容易。可幸係曼聯攻擊力不俗，葡萄牙進攻中場般奴費南迪斯4場作客均有士哥，佢喺雲迪碧克上陣時獲得解放，可以更放心進攻，加上老將卡雲尼無論踢正選抑或後備皆宜，即使今場拉舒福特膊頭有傷未必出得，仍然夠本錢同韋斯咸鬥攻，2.5球入球大抵玩。 |